Lea-Artibai eta Mutriku

2009-07-02 | 16:51:36

Guztia dago prest Amorotoko San Martin jaietarako

Herritar askoren artean lan eginda ateratzen dituzte aurrera jaiok

Uztailaren 3tik 6ra izango dira aurtengo San Martin Jaiak Amoroton. Esan daiteke auzolanean oinarritutako jaiak direla, herritar askoren artean prestatzen eta aurrera ateratzen direlako. Jai Batzordean, gaur egun, 15-20 gazte batzen dira; 17 urtetik 35 bitartekoak. Aldez aurretiko antolaketaren ardura eurek daroe. Jaietan, berriz, txosnetako txandak egiten edo eta bestelako lanetan, 122 herritar ageri dira txandak zehazten dituen orrian. Beharra eta jaia, dena doa batera.

• JAIEN EGITARAUA

Ez du erantzunik

2009-06-15 | 15:36:04

Iaz baino jende gehiago ibili da Oletako Pazkoetan

Ikusmina piztu zuen domeka arratsaldeko desafio bereziak. Denetarik entzuten zen proba hasi baino lehen; batzuek zortzi mutilak nagusituko zirela zioten, eta beste batzuek, berriz, Bitorio Zelaiarena asto itzela zela... Zelai ingurua jendez betetzen joan zen 18:00etatik aurrera. Proba aterrian egitea komeni zen, eta zerua mehatxuka zegoen. 
Astoak, benetan tamaina handiko aberea bera, erraz egin zuen lana, Juanjo eta Jaio karreteroen laguntzagaz. Ez zen behartuta ikusi. Hogei minutuen txistua jo zutenean 68 untza eginak zituen. Gaitza zeukaten mutilek. Oso gaitza. Beharra ederto egin zuten hala ere, etsi barik, eta 54 plaza egin zituzten. Txaloka eskertu zieten lana. 

Ez du erantzunik

2009-06-11 | 14:30:47

Amorotoko Udalak diru laguntza emango dio HITZAri

2010etik aurrera urteko eta biztanleko hiru euro emango dizkio; aurten ere lagunduko du diruz

Amorotoko Udalak ere Lea-Artibai eta Mutrikuko Hitzari diru laguntza ematea erabaki du azken udalbatzarrean. Aurten ere laguntza emango dion arren, 2010etik aurrera bideratuko ditu biztanleko eta urteko 3 euro bertoko euskarazko egunkarira. Ispasterko Udalak orain gutxi hartutako erabakiaren atzetik etorri da Amorotokoarena. Ispasterkoak urteko eta biztanleko euro bigaz lagunduko du Hitza.

3 erantzun

2009-06-11 | 14:24:31

Zapatutik astelehenera Pazko giroak Oletan batuko ditu albo herrietakoak

Domekarako desafio berezia antolatu dute:eskualdeko zortzi mutil eta Bitorio Zelaiaren astoa, nor baino nor, 700 kiloko harriagaz.

Oletako 700 kiloko harri gorria; 28 metro luzerako hormigoizko zelai zatia eta hogei minutu dena emateko. Horra hor domeka arratsalderako Oletan prestatu duten desafiorako baldintzak. Partaideak: alde batetik Eibarko Bitorio Zelaiaren astoa, eta bestetik Danok Bat izenagaz, Lea-Artibaiko zortzi mutil. 
Lau hanka, batetik. Bestetik, elkarregaz oso ondo koordinatu beharko duten zortzi hanka pare. Lau laguneko bi iladatan antolatuta joango dira mutilak, helduleku zabal biri kolpeta. Amoroton pasa den urtarrilean egin zuten proban sorbaldatik beherako trintxekin lotuta joan ziren, baina oraingoan ez. 
Eguraldiak, jende gehiago ala gutxiago ekartzeaz aparte, euren lana ere baldintzatu dezake: «bustian gaitzagoa da hau karrejua baino, sikuan igoal hobeto», esan dute. Hamar entrenaldi saio egin dituzte, iluntzeko orduetan.
Zenbat untza egingo dituzten, domekan ikusiko da. Eurek «50eko biribila» lortu nahi lukete.

• JAIEN EGITARAUA

Ez du erantzunik

2009-06-10 | 14:35:01

BENEDIKTA TXAKARTEGI ATXURRA, Amorotoko nagusiena

98 urte beteko ditu abuztuan, Ameriketan jaio eta Oletan bizi den etxekoandreak.

Herriko zaharrena da une honetan Benedikta Txakartegi Atxurra (Boise, Idaho, AEB, 1911). Oletako Zeille Errotan bizi da alaba nagusiagaz eta suhinagaz. Pausoa laburtu zaion arren, ahotsa sendo, begirada bizi eta auturako gogoagaz dago, dotore. «Kontuz, honek berak ere elkarrizketa egingo dizu», alaba Josefinaren abisua. Eta arrazoia. Kontularia baita Benedikta Txakartegi. Eta memorian hautsik kendu beharrik ez du; «batzuetan berak gogoratu eragiten dizkigu gauzak», alabak albotik.
Laster 98, Benedikta. …
Bai, abuztuaren 7an egingo ditut.
Zuen aita ere asko nagusitu ei zen, ezta?
100 urte egiteko zazpi hilabete falta zituela hil zen. Ipidegikoa zen aita, eta ama Amorotoko Agarrekoa.
Odolean daukazu osasun ona, orduan.
Bai edo! [barrez], Jaungoikoari eskerrak ondo nago, bai.
Seme-alaba, loba eta birloba piloagaz.
Zazpi seme-alaba dauzkat, hamalau loba eta hamabi birloba; hamahirugarrena ere bidean dator. Horiexek denak dira nire poza.
Goazen txikitako kontuak gogoratzera pixka bat.
Ameriketan jaio nintzen ni, Boisen. Gurasoak han zeuden, aita artzain ibili zen. Gero, 10 urte neukazanean, bueltan etorri ginen. Eta nire neba, berriz, 11 urte egindakoan harantz joan zen. Gu etorri eta gero ha joan.

ELKARRIZKETA OSOA, BIHARKO HITZAREN PAPEREZKO EDIZIOAN

Ez du erantzunik

2009-06-04 | 17:56:50

Zulueta eta Oleta arteko saneamendua egiteko proiektuari hasierako onarpena eman dio Aldundiak

Guztira 719.170 euroko aurrekontua dauka egitasmoak, eta Zulueta auzoko etxeen eta Erabil lantegiaren ur lohiak batuko ditu kolektore berriak

Ez du erantzunik

2009-05-25 | 17:20:43

Amoroton geratu dira XX. Pala Txapelketako garaikur nagusiak

Gotzon eta Jon izan dira irabazle lehen mailan, eta Leoncio eta Elorrieta bigarrenean

Aurten, hogei urteotan antolatzaile lanetan diharduen Anton Gabiolak ere txapel berezia jaso du herriko gazteen eskutik.

Erantzun 1

2009-05-22 | 15:07:44

Sei hilabete barru ur biltegiaren proiektua amaituko da

Abendua heldu orduko, Amoroto eta Lekeitio ur biltegi berriagaz lotuko dituen ur hodien sarea eraikiko da.

Amoroto eta Lekeitio salbuespen egoeretan hornituko dituen ur biltegi berriaren bigarren fasea abenduan amaituko da. Ur biltegia eginda, ura bi herrietara eroateko sarea eraikiko da proiektua amaitzeko falta diren azken sei hilabeteetan.

Erantzun 1